O Consello da Xunta de Galicia ven de aprobar na súa reunión deste xoves o cambio de titularidade de dous treitos das estradas provinciais OU-0358 (ramal a Berán de Arriba) e da OU-0351 (San Clodio-Cuñas), ambas  a prol do Concello de Leiro.

No caso da estrada provincial OU-0351 entre San Clodio e Cuña, a transferencia afecta o treito entre os puntos quilométricos 0+000 e o 1+165, cunha lonxitude de máis de 1,1 quilómetros. Así mesmo, transferirase o ramal a Berán de Arriba, das estrada provincial OU-0358.
Ao abeiro das previsións legais, o Pleno da Deputación de Ourense xa acordou previamente ambos cambios de titularidade, por petición do Concello de Leiro, sinala o acordo do Consello da Xunta.

A medida fundaméntase en que ambos os tramos adquiriron as características propias dun treito urbano e, con este paso administrativo, simplificaríanse a tramitación de permisos de edificacións nas súas marxes, construción de infraestruturas e servizos urbanos.
Agora, o Concello de Leiro deberá incorporar ao seu Plan de estradas os treitos a que se refire este decreto, cuxa entrega se completará no prazo dos dous meses seguintes á publicación deste decreto no Diario Oficial de Galicia (DOG).

Correspóndelle ao Concello, a partir da formalización da entrega, todas as actividades de xestión, mantemento, conservación e explotación da vía, así como o exercicio das funcións de disciplina viaria e calquera outra que puidese corresponderlle como nova administración titular da estrada.