En Verín, o delegado territorial da Xunta en Ourense, Rogelio Martínez, incidiu este xoves na importancia do comercio de proximidade como "un importante elemento dinamizador das vilas e cidades galegas e un sector de relevancia para a reactivación económica". Esta afirmación produciuse na entrega dun diploma a unha empresa familiar de Verín pola que pasaron xa catro xeracións dende a súa fundación en 1909.

O recoñecemento provén do Centro Comercial Aberto de Verín dentro de A semana do teu comercio:unha semana, un comercio, unha historia, unha campaña coa que a Consellería de Economía e Industria da Xunta de Galicia tenta poñer en valor o traballo que están a desenvolver os 52 centros comerciais abertos que, a día de hoxe, existen en Galicia.

No acto, Rogelio Martínez lembrou que o apoio ao comercio de proximidade é un dos eixos estratéxicos da Consellería de Economía e Industria. Así, este departamento autonómico ten aberto o prazo de solicitude para o novo programa de axudas ás asociacións de comerciantes para a dinamización dos centros comerciais abertos e prazas de abastos, que está dotado con 2,2 millóns de euros, un 10% máis que o ano pasado.
Martínez engadiu que o ano pasado beneficiáronse destas axudas 7 centros comerciais abertos e unha praza de abastos da provincia, cunhas achegas que superaron os 255.000 euros.

As axudas, que poderán solicitarse ata o 22 de maio, poden chegar no caso dos centros comerciais abertos ata 40.000 euros e alcanzar o 80% do investimento subvencionable. No caso das asociacións das prazas de abastos, a porcentaxe de axuda é do 70%, podendo alcanzar un máximo de 9.800 euros.