A Xunta de Goberno Local aprobou en sesión extraordinaria celebrada este venres o convenio de cooperación entre o Concello de Ourense e o centro especial de emprego Aspanas Termal SLU para fomentar o acceso a un posto de traballo de persoas con discapacidade intelectual. Este convenio ten un importe de 80.131 euros.
O convenio permite dar apoio ao programa que desenvolve Aspanas Termal, que permite acceder a un posto de traballo a 32 persoas con discapacidade, que previamente recibiron a formación necesaria para adquirir competencias precisas para os seus traballos.

A colaboración obxecto deste convenio concrétase nas accións derivadas da posta en marcha, desenvolvemento, xestión e avaliación dun programa de fomento do emprego nos ámbitos do medio ambiente e do termalismo en Ourense.
Así, o Centro especial de emprego ASPANAS Termal SLU adquire o compromiso de poñer en marcha, desenvolver e xestionar o programa de fomento do emprego nos ámbitos do medio ambiente e do termalismo, con accións de actividades de información e orientación nas zonas termais da Chavasqueira, O Tinteiro e o Muiño, así como actividades de reforzo da limpeza n os parques de San Lázaro, Alameda, Infantil, Xardín do Posío e contorno dos Remedios.
Pola súa parte, o Concello comprométese a prestar apoio ao centro especial de emprego ASPANAS TERMAL SLU para estas actividades e realizará unha achega de 80.131 euros ao obxectivo de financiar os gastos derivados da posta en marcha, o desenvolvemento e xestión do programa.

Programa de apoio aos centros educativos

A Xunta Local deu tamén esta mañá o visto bo ao programa de apoio a centros educativos da Concellería de Educación do Concello de Ourense para o curso 2012/2013, que dará atención a escolares de Infantil e Primaria dos colexios públicos da cidade.
Consiste, básicamente, en prestar un servizo de atención lúdico-educativa aos nenos que acuden ao comedor escolar, realizando actividades, dende que remata o horario de comedor, ás 16:00 horas, ata as 17:00 horas, para favorecer a conciliación da vida familiar e laboral das súas familias, permitindo a nais e pais recoller aos nenos unha hora máis tarde do remate da actividade do comedor.

O programa ten como obxectivos afianzar e complementar os coñecementos académicos, aumentar a oferta lúdico educativa, promover a integración social e a maior solidariedade cos rapaces máis necesitados e axudar a conciliar a vida laboral e familiar.

O servizo de atención lúdico educativo prestarase de luns a venres nos CEIP Manuel Sueiro, Covadonga, As Mercedes, Irmáns Villar, CEE Miño, A Ponte, Mestre Vide, Manuel Luis Acuña, Mariñamansa, Mende e Inmaculada.