A Concellería de Benestar Social do Concello de Ourense prestará un ano máis apoio ás familias de escasos recursos económicos para afrontar os gastos do novo curso escolar. A Xunta de Goberno Local aprobou na súa xuntanza deste mércores a resolución da convocatoria e relación de beneficiarios dun total de 724 axudas ás familias ourensáns, das que 441 serán para sufragar custes de comedor escolar e outras 283 serán para a adquisición de libros.
A cifra aínda podería incrementarse, dado que nos vindeiros días as listas exporanse ao público no Concello, e abrirase un prazo dun mes no que as persoas que o estimen oportuno poderán presentar reclamación.

O Concello de Ourense destinará uns 400.000 euros a estas axudas, que darán apoio a familias de Ourense, que teñan menores ao seu cargo escolarizados en centros públicos ou concertados para o curso 2012/2012, cunha renda per cápita anual non superior a 3.500 euros.

As axudas para libros e material escolar están dirixidas a escolares matriculados en Educación Infantil (nenos de 3, 4 e 5 anos), e as de comedor a alumnos tanto de Educación Infantil, como de Primaria ou Secundaria Obrigatoria.
As axudas en especie para libros e material escolar van desde os 90 euros por alumno para os de 3 anos, 110 para os de 4 e 125 para os nenos de 3 anos que cursen Educación Infantil.
Polo que respecta ás axudas para comedor escolar, estas achegas cubrirán a totalidade do custe da praza nos centros públicos e ascenderán a 45 euros ao mes nos centros concertados.