O vicepresidente da Deputación de Ourense, Rosendo Fernández, e o director da Escola Provincial de Gaitas e da Real Banda de Gaitas, Xosé Lois Foxo, presentaron este martes unha nova edición do Anuario da Gaita, publicación editada pola institución provincial e que constitúe unha referencia no eido da investigación e na difusión deste instrumento musical tradicional. O Anuario da Gaita chega este ano á súa edición número 26 e abrangue nos seus diferentes apartados temas relativos ás actividades divulgativas, investigacións e estudos sobre este instrumento, ademais de colaboracións de expertos e traballos de ámbito histórico e etnográfico.

Rosendo Fernández dixo que o Anuario da Gaita "recolle cada ano parte da tradición de Ourense e Galicia vencellada a un instrumento galego como é a gaita, traballo que non sería posible sen a dedicación e esforzo de Xosé Lois Foxo e o seu equipo". Rosendo Fernández engadiu que Ourense mantivo dende vellos tempos "unha importante tradición musical, levando a dianteira en moitos sensos en relación ao desenvolvemento da cultura galega, algo polo que é considerada a Atenas de Galicia, e que se corrobora co traballo de difusión e investigación que dende a Deputación de Ourense e a Escola de Gaitas se fai por este instrumento".

Xosé Lois Foxo explicou que no eido da gaita, o achegamento a este instrumento de forma científica non ten parangón, "e boa mostra diso son o museo, único no mundo, co que conta a Escola de Gaitas; esta publicación, na que destaca a súa tarefa investigadora, e, no aspecto académico, a Escola de Gaitas, que conseguiu deixar atrás a tradición do gaiteiro como músico ágrafo para convertelo nun estudoso do instrumento".