O Centro Cultural Marcos Valcárcel da Deputación de Ourense inaugura este venres, 29 de xuño, a exposición REFLEXARTE, un proxecto de investigación en vidro de once artistas galegos e que chega a Ourense grazas á colaboración da iniciativa privada coa Deputación.
Con este novo proxecto, "o Centro Cultural mantén o seu camiño de consolidación expositiva abrindo ventás a novos campos de actuación artísticos comprometidos coa cultura galega", sinalan os seus responsables.
O proxecto nace na Coruña, con motivo do 75 aniversario da Cristalería El Reflejo, fundada en 1935 por Jesús Ares González. Grazas á xenerosidade desta empresa, os artistas puideron construír os seus propios soños deixando que a imaxinación fluíse a través da beleza e luminosidade transparente do cristal.

Julia Ares, María Xosé Díaz, Tono Galán, Tiago Madeira, Acisclo Manzano, Manuel Patinha, Soledad Penalta, Paco Pestana, Montse Rego, Carmen Senande e Álvaro de la Vega son creadores que desenvolven o seu traballo dende hai anos dentro do ámbito da escultura, e o único argumento que os uniu para a ocasión é o emprego do vidro como medio de actuación.

A súa unión neste proxecto vén demostrar que hoxe a única barreira que se pode aplicar á arte contemporánea é a da calidade. A súa particular visión, utilizando o vidro cunha versatilidade extraordinaria, ensancha o significado de soportes e procedementos.