O Concello de Vilar de Santos anuncia que recepcionará nos próximos días a Nova Estación Depuradora de Augas Residuais, EDAR, logo do remate das obras que levou a cabo a Confederación Hidrográfica do Miño-Sil Os traballos supuxeron un investimento global de 578.244 euros.

O proxecto contemplou as actuacións necesarias para a construción de 2 eixos de colectores de conexión á rede xeral de saneamento de Vilar de Santos, un primeiro ramal de 755 metros e outro de 577 metros subdividido á sua vez noutros tres de xeito que se logra unificar os vertidos, así como a construcción da nova Estación Depuradora que é "de tipo compacto por aeración prolongada".
Esta nova EDAR, que se sitúa nunha parcela municipal de 3.454 metros cadrados, cubre un horizonte poboacional de 1.000 veciños.

O súmase a outras actuacións e investimentos realizados nos últimos anos polo Concello, que alcanzan un total de 2 millóns de euros no sistema de Abastecemento e Saneamento municipal. O Concello de Vilar de Santos lembra que desde o ano 2010 está totalmente operativa outra obra "fundamental" moi avanzada tecnolóxicamente, unha Estación de Tratamento de Auga Potable, ETAP, que supuxo un investimento de 552.000 euros, e que garante a auga e a súa máxima calidade nos núcleos do concello.

Co remate das obras o Concello de Vilar de Santos consegue a mellora e modernización do Sistema de Abastecemento e Saneamento á totalidade dos veciños pechando o Ciclo Integral da Auga, asumindo a xestión desde a captación, o transporte, a potabilización e distribución, así como a recollida e depuración.
O obxectivo primordial é cumprir as condicións da Directiva Marco Comunitaria e contribuir decididamente á mellora da calidade de vida dos veciños e á sostibilidade do medio coa conservación e preservación da calidade da auga para o futuro.