A pianista pontevedresa Carolina Fernández Loureiro, ofrecerá este sábado, 28 de xaneiro, ás 20.30 horas, un concerto no Teatro Principal de Ourense, patrocinado pola Deputación provincial de Ourense e coa colaboración da ONCE.
No acto de presentación do concerto que tivo lugar este xoves na Deputación de Ourense, o vicepresidente da institución provincial, Rosendo Fernández, sinalou que
unha das prioridades da institución provincial son as políticas sociais, "e entre elas, o apoio á integración das persoas con discapacidade, que, como Carolina Fernández, demóstrannos día a día que o tesón e a forza de vontade son quen de rachar con calquera barreira que poida ter o ser humano para facer realidade os seus desexos".

Pola súa banda, Carolina Fernández dixo sentirse "moi ilusionada" con este concerto, "pois é a primeira vez que actúo en Galicia, e iso, unido ao feito de que é a miña terra, fai que o concerto do sábado sexa moi especial".
A artista, que agradeceu o apoio da Deputación de Ourense, como patrocinadora do concerto, e de José Mayo como coordinador do mesmo, definiu a súa música como unha fusión de estilos, que van desde o new age ata a música indi e mesmo oriental, "mestura que para este concerto tamén conta con raíces de música galega".

Carolina Fernández (Vilagarcía de Arousa, 1972) perdeu á vista aos 12 anos, e conseguiu grazas ao seu afán de superación converterse nunha destacada pianista, que ten cultivado os máis variados estilos musicais, que van dende a música clásica pasando polo folk, pop, rock, jazz ou a música latina.
Na actualidade, Carolina Fernández é profesora de piano, armonía, solfeo, canto e coro, e realiza una media de trinta concertos anuais en diversos lugares de España.