O arquipélago portugués de Azores, representado polas Cámaras de Comercio e Industria das illas a través da de Horta, será o convidado especial de Xantar 2012, o Salón Galego de Gastronomía e Turismo, que celebrará a súa 13ª edición en Expourense entre o 1 e o 5 de febreiro. Así o deu a coñecer este luns a organización desta nova edición do certame gastronómico.
As Azores participarán en todas as accións previstas para esta edición de Xantar promocionando a súa gastronomía, turismo, artesanía e produtos agroalimentarios.

Esta acción reforza as sinerxias derivadas da última misión empresarial promovida por Expourense e pola Cámara de Comercio de Horta na que participaron diversas empresas galegas relacionadas co sector agroalimentario e da pesca e vencelladas a Xantar", sinalan os responsables de Expourense, organizador deste Salón da Gastronomía.
Esta visita ó arquipélago supuxo o inicio dos contactos entre o sector produtivo galego e azoriano e a participación en Xantar permitirá reforzar estas relacións.

As Azores terán a súa propia área de restauración na feira na que se poderán degustar dous menús diferentes que porán en valor os seus produtos primarios baseados nunha agricultura, gandería e pesca sostibles, enmarcados ademais na Dieta Atlántica e no que destacan as súas carnes, peixes, lácteos, froitas e viños. 
Estes menús inclúen produtos maís senlleiros das distintas localidades do arquipélago como é o caso do queixo de San Jorge, o flan de té de Porto Formoso (a única plantación de té de Europa) ou os viños da Ilha do Pico.