A Xunta de Goberno Local aprobou este venres o expediente de contratación para a subministración e instalación dun sistema óptico-acústico nos bolardos dos accesos ó casco antigo de Ourense.
Por unha banda, o sistema actual será implementado cun avisador acústico, que incorporará unha sinal sonora que se activaría antes do inicio da subida da pilona e se mantería ata o peche da mesma, así coma un programador horario para interrumpir a sinal en horas nocturnas.
Por outra banda, incorporarase un avisador luminoso que substituiría á actual banda reflectante por unha coroa de ópticas Led de cor vermella, que se activaría durante o funcionamento da pilona. Deste xeito, complementaría ó avisador acústico durante o día, e reforzaría a seguridade nas horas nocturnas.

O novo sistema será instalado na totalidade de bolardos de acceso ó casco vello da cidade, en 15 zonas: rúa Santo Domingo-Parque de San Lázaro, rúa Santo Domingo-rúa Concordia (2), rúa Alejandro Outeiriño, rúa Doutor Marañón, rúa Desengano, rúa Vilar (3), rúa Padre Feijóo, rúa Xulio Prieto, rúa Pena Corneira, San Francisco, Praza San Cosme e Cruz Vermella (rúa Díaz de la Banda)

Mediante o reforzo do sistema, que incrementará ostensiblemente a súa visibilidade, preténdese incrementar a seguridade tanto peonil coma dos vehículos, así como diminuír posibles riscos de accidente.

Xestión integral de Outariz e Burga de Canedo para ASPANAS Termal

Ata o de agora, a xestión dos espazos termais na zona de Outariz e Burgas de Canedo, con dúas zonas de baño de uso público e gratuíto, adoptaba diversos xeitos de contratación para levar a cabo o mantemento da zona e as instalacións. Mediante a contratación, para ofrecer ós usuarios mellores condicións o servizo de xestión integral inclúe: o servizo de vixilancia, control e información da área termal, o mantemento, limpeza e desinfección das instalacións, equipamento e mobiliario da área termal, a prestación de primeiros auxilios e contacto con servizos de emerxencias, o mantemento das zonas verdes, mobiliario e viais, así como a explotación de bar e kiosko terraza.

A zona termal de Outariz e Burgas de Canedo sitúase na marxe dereita do Miño, no lugar de Outariz, e ocupa unha superficie aproximada de 6.000 m2, delimitada polo río Miño, o paseo peonil e o talude da autovía. Conta con dous accesos: un dende o paseo e outro dende a pasarela que comunica coa marxe esquerda do Miño.