O investigador ourensán e estudoso do Carlismo, Manuel Rego Nieto, fixo entrega este martes á Deputación de Ourense dos fondos da súa biblioteca particular sobre o Carlismo, integrada por 459 libros e documentos dun gran valor histórico para coñecer a evolución deste movemento político tanto en España como en Galicia e, en particular, en Ourense.

O acto da doazón tivo lugar no Salón de Plenos da institución provincial coa presenza do presidente da Deputación José Luis Baltar, quen agradeceu “o xesto desinteresado e a gran achega que para os estudosos vai supoñer esta biblioteca de Manuel Rego”, engadindo que desta maneira “vaise garantir o mantemento desta biblioteca para que todos aqueles que estean interesados en afondar na historia do Carlismo o poidan facer, tendo á súa disposición na Deputación de Ourense estes documentos que con enorme xenerosidade nos doa Manuel Rego a todos”.

Pola súa banda, Manuel Rego dixo que ao longo da súa vida defendeu “contra vento e marea” os ideais do Carlismo, “o que me custou moitas detencións e algún calabozo, pero pagou a pena pola defensa da democracia naqueles tempos tan difíciles”. Rego define ao Carlismo como “unha ilusión, non só unha ideoloxía”, partido no que milita e do que chegou a ser candidato ao Senado por Ourense no ano 1979.

Actualmente Rego é secretario xeral do Partido Carlista de Galicia e forma parte do Consello Federal Carlista. Ao longo da súa traxectoria profesional, Manuel Rego estivo sempre vencellado profesionalmente ao mundo da cultura en Ourense, ocupando diferentes cargos de responsabilidade no Concello e na Deputación, e foi tamén presidente da Coral de Ruada.