A Xunta de Goberno Local incluíu este xoves na súa relación de asuntos a aprobación da ordenación decrecente das ofertas presentadas para a contratación das obras de conexión do AR-22-O coa glorieta API-A3 do PXOM de Ourense, en base ós informes técnicos.
Trátase das obras do primeiro tramo do futuro vial na marxe esquerda do río Barbaña, que comunicará a ponte executada nas proximidades da glorieta de Nosa Señora da Saínza coa ponte entre Manuel Murguía e a rúa dos Ponxos.

A mellor das 25 ofertas presentadas correspóndelle a Extraco Construccións e Proxectos S.A., nunha obra que abrangue unha superficie total de actuación de 2.817 m2, e que contempla a infraestructura viaria, as instalacións de abastecemento de auga, o rego de xardín, saneamento, drenaxe, iluminación pública e telecomunicacións.
Sinala o Concello de Ourense que este é o primeiro e o único tramo que se pode executar na actualidade, que servirá para completar as obras de urbanización aprobadas do solo de A Farixa (Eroski) e coa glorieta de Carrefour.
O orzamento de licitación é de 247.512 euros, e o prazo de execución de 3 meses.

Auditoría externa do Servizo de Limpeza da cidade

Por outra banda, a mesma sesión da Xunta de Goberno aprobou o expediente de contratación da elaboración dunha auditoría do Servizo de Limpeza Pública Urbana, Transporte e recollida de residuos sólidos urbanos do Concello de Ourense.

Esta auditoría terá unha dobre finalidade: por unha parte analizar o grao de cumprimento que fai a empresa do servizo que lle foi aduxicado no seu dia; por outra, aportar propostas coas que se entenda que se pode mellorar o servizo.