O Concello de Ourense coa colaboración da Xunta de Galicia desenvolverá un proxecto destinado a facilitar formación especializada nos sectores do termalismo, comercio e axuda no fogar. Este programa permitirá acceder a un posto de traballo a 120 desempregados ourensáns, segundo informou este luns o propio Concello desta cidade.
Coordinado pola Concellería de Promoción Económica e Emprego que dirixe José Angel Vázquez Barquero, o programa integrado Intermedia desenvolverase dende o presente mes de outubro ata abril de 2012.

O Concello de Ourense ven de recibir a comunicación, por parte da Dirección Xeral de Formación e Colocación da Xunta de Galicia, da concesión dunha subvención para executar este programa, ao abeiro da orde de 12 de maio de subvencións para o desenvolvemento de programas de formación para o emprego. Participarán 120 desempregados, e os obxectivos son acadar alomenos 48 insercións laborais. Para este finalidade, disponse dun orzamento total de 182.144,40 euros en dúas anualidades (2011 e 2012), dos que o Concello achegará 24.831,70 euros anuais e a Xunta 66.240 euros anuais.
O proxecto, dirixido a persoas desempregadas, reservará o 60% das prazas a persoas que an actualidade estean a recibir prestacións ou subsidios por desemprego que se atopen en situación de paro como consecuencia dunha crise empresarial.

A finalidade do programa é acadar a inserción laboral dos participantes en empresas adicadas aos servizos de axuda no fogar.

Máis de 600 participantes en programas de inserción laboral

Sinala o departamento de Vázquez Barquero que a execución deste programa integrado permitirá dar continuidade aos programas de inserción sociolaboral que o Concello de Ourense ven desenvolvendo durante os últimos catro anos. Con este programa, elevarase a 665 o número de participantes en programas específicos de formación para a inserción sociolaboral.

Entre eles, os programas integrados Aténdeme, que contou con 100 participantes, centrado nos sectores de medio ambiente e atención sociosanitaria a persoas dependentes, o programa integrado Piter (que proporcionou formación a 150 desempregados para a súa inserción laboral no sector de Medio Ambiente), e o programa experimental en materia de emprego Proexpem (35), centrado tamén no sector do Medio Ambiente. A estes programas únense os cursos formativos nos sectores da Informática (195 participantes), Traballador forestal (15), ou a Escola Obradoiro A Imprensa, que deu formación a 50 alumnos nas especialidades de albanelería, cantería, carpintería e forxa)