A Deputación Provincial de Ourense anuncia que porá en marcha a partir de xaneiro de 2012 a segunda fase do Plan de Mobilidade, que ten como obxectivo reducir os accidentes in itinere ademais de concienciar e promover entre os cidadáns o uso de transportes alternativos e sostibles medioambientalmente.
Para analizar a desenvolvemento do plan, a Comisión de Mobilidade da Deputación mantivo este xoves unha reunión para planificar o Plan de Mobilidade de cara ao ano 2012. Os membros da comisión elaboraron o calendario de actividades e accións formativas que se levarán a cabo a partir de xaneiro de 2012, calendario que será presentado no vindeiro mes de decembro.

O Plan de Mobilidade da Deputación de Ourense foi redactado no ano 2010, sendo pioneira a institución provincial na elaboración dun planeamento destas características. A fase inicial era de carácter interno, e os obxectivos foron a redución dos accidentes in itinere e o aproveitamento de recursos como o vehículo compartido, ou o transporte público.
Entre as propostas figuraba promover o uso da bicicleta e de ir camiñando ao traballo ou utilizar transporte público, con fin de diminuír a sinistralidade, reducir consumos de combustibles e minimizar as agresións medioambientais que producen o tráfico, a mala planificación dos desprazamentos e o transporte en xeral.

Segundo a institución provincial ourensá, agora a Comisión quere dar un paso máis: a partir do ano 2012 está previsto comezar una nova fase dirixida á cidadanía (veciños, colectivos, colexios, etc.), na que se realizarán, entre outras actividades, cursos de condución eficiente e condución segura; e as campaña “Camiña para ir ao traballo”, e “Comparte coche”. Tamén contempla o Plan impulsar a mellora das infraestruturas relacionadas coa mobilidade e do transporte público en xeral.
O Plan inclúe a planificación de novas zonas de estacionamento na contorna dos edificios públicos, a creación de prazas de aparcamento para bicicletas e o estudio de convenios coas empresas que xestionan o transporte público para planificar novas rutas a prezos atractivos para os usuarios.