“Tres, dous, un... malvasía cabecibranca euroasiática e otruos retratos” é o título da exposición que o artista ourensán Xosé Vilamoure inaugurou ese xoves no centro Cultural da Deputación de Ourense, e que ten ao retrato como eixo condutor das tres series que a conforman, investigando e aportando unha visión persoal do mesmo.

A exposición nace cunha serie de retratos de artistas e creadores internacionais a partires da lectura dun libro da editorial Taschen. Logo pasa a unha serie de retratos de amigos vencellados ao lugar no que traballa o artista, o “Ollo Ledo”, e remata con algo máis de trinta retratos de diferentes especies animais en perigo de extinción, prácticamente todas elas con corpos humanizados nunha clara referencia a esa loita entre o animal e o ser humano pola súa supervivencia.

O director do Centro Cultural loubou a calidade artística e o rigor no traballo de Xosé Vilamoure, “que sempre tivo moi claro o que quería facer e como quería facer esta exposición, algo que nos facilitou moito as cousas”, ao tempo que engadíu que “é un pintor sin o que o panorama artístico ourensán estaría incompleto pola súa gran calidade”.
Vilamoure, pola súa banda, agradeceu estas verbas así como a aposta do Centro Cultural da Deputación por unha obra que non ten un carácter comercial e que, polo tanto non pode ir a galerías. “Eu sempre tiven claro que se podía facer esta exposición tería que ser aquí”, dixo.