A Concellería de Turismo de Ourense do Concello de Ourense ven de ampliar o seu fondo de publicacións turísticas coa edición dun roteiro centrado no núcleo rural de Seixalbo, o único catalogado de interese histórico e etnográfico a protexer segundo o Plan Xeral de Urbanismo de 1986, vixente na actualidade.
O folleto, que mantén o deseño e formato doutros roteiros como o Termal, o Patrimonial ou a Ruta de Tapeo nos Viños, foi elaborado pola Concellería en colaboración coa Asociación Cultural Agromadas, e contempla tanto un percorrido urbán como outro verde deténdose nas paisaxes que rodean o núcleo.

O Roteiro de Seixalbo foi presentado no Salón de Plenos, en presenza da Concelleira de Turismo, Ana Garza Cortiñas, o Concelleiro de Perímetro Rural e veciño de Seixalbo, Manuel Herminio Iglesias, a vicepresidenta de Agromadas, Margarita Seara, e o presidente da Asociación de Veciños  de Seixalbo, Juan Cid Boo. Durante a presentación Garza falou da “débeda histórica” que a cidade tiña con Seixalbo a hora de reinvidincar este núcleo e que “entrase  a formar parte do catálogo de atractivos turístico da cidade”.
Neste sentido, a edil de Turismo incidiu na importancia de “dar ao turista a oportunidade de coñecer este núcleo singular e fermoso, que mantén todo o seu atractivo histórico e patrimonial, aportandolle unha información nova da que antes non dispoñiamos”. 

Pola súa banda, o concelleiro de Perímetro Rural, Manuel Herminio Iglesias, lembrou “o importante movemento asociativo e a dinamización que se ten dado en Seixalbo”, unha reinvindicación do lugar que tivo “ a súa resposta municipal, coa publicación por parte de Cultura do volume Anacos do Pasado e agora o novo roteiro editado desde Turismo”.
A vicepresidenta de Agromadas, Margarita Seara, e o presidente da A.VV. de Seixalbo incidiron na necesidade de continuar o proxecto de rehabilitación e acondicionamento de Seixalbo “porque aínda queda moitísimo traballo por facer” e agradeceron á Concellería a aposta realizada por reinvidicar o atractivo turístico da zona.

O novo roteiro de Seixalbo sae a rúa cunha primeira tirada de 5.000 exemplares que se distribuirán no Centro de Recepción de Visitantes así como os diferentes puntos de Información Turística da Cidade, en Maimón, Outariz, Burgas, Albergue de Peregrino e Santomé. A publicación é xa o quinto folleto editado desde a Concellería de Turismo, xunto co novo rueiro da cidade, o roteiro histórico- patrimonial, a ruta termal, a ruta de Pinchos e a ruta de shopping.