Unha das referencias do hip hop estatal, o letrista Kase.O visitará á cidade de Ourense. O vindeiro 25 de febreiro, o artista actuará  no escenario do Auditorio Municipal en compaña do cuarteto musical Jazz Magnetism, un espectáculo que chega a Ourense grazas a unha iniciativa da Concellería de Xuventude e Voluntariado.
Segundo declarou este martes durante a presentación do evento a propia edil de área, a nacionalista Marta Arribas, a nova actividade responde a “o compromiso continuo desta concellería por ofertar aos nosos mozos e mozas ofertas de lecer de calidade e referencia pensadas para eles e de máxima actualidade”.
Neste sentido é de destacar o esforzo económico realizado desde este departamento municipal na organización do concerto, con entradas a un prezo “axustado” de 14€ a 17€.

“A elección deste concerto non foi froito do azar” senón que obedece, tanto a calidade dos músicos senón pola temáticas abordadas nas letras de Kase.O, que “gardan o respecto e a reinvindicación dos valores que desde a nosa acción de goberno local queremos fomentar e promover para os nosos mozos e mozas”, sinalou Marta Arribas no transcurso da presentación.
“A lírica de Kase.O, se cadra o letrista máis importante do hip hop hoxe no Estado, fala dunha liberdade e unha xustiza posíbeis a un tempo en nun país,  a liberdade entre pobos, cidadáns e xéneros, a solidaridade internacional con especial sensibilidade cara o Terceiro Mundo, e o respeito á multiculturalidade e á pluralidade nacional presentes no Estado”, destacou Marta Arribas.
A edil do BNG destacou, así mesmo, que Kase.O é o primeiro cantante de rap aragonés en reinvindicar a fabla como riqueza lingüística do seu pobo, “algo co que nos sensibilizamos e agradecemos de especial xeito”.