O director xeral de Promoción de Emprego, Andrés Hermida, e o delegado territorial da Xunta en Ourense, Rogelio Martínez, clausuraron este luns o obradoiro de emprego de Baltar, iniciativa mixta de formación e emprego que tivo como obxectivo mellorar a empregabilidade dos participantes.
Segundo os datos facilitados ao respecto, o obradoiro de emprego do concello de Baltar formou e posibilitou a contratación durante un ano dun total de 25 persoas. Para a posta en marcha desta iniciativa, o Goberno galego investiu máis de 530.000 euros.

O director xeral de Promoción de Emprego destacou que os obradoiros son “unha ferramenta na loita contra o desemprego”, xa que habilitan “formación téorico-práctica” para determinadas profesións, ao combinar formación profesional para o emprego co desempeño dun traballo “real e produtivo”.
Neste caso, o alumnado formouse en tres especialidades: albanelería, restauración de áreas degradadas, e cantería. Así, o traballo que levaron a cabo permitiu, ao mesmo tempo, a mellora das dotacións públicas.
Entre outras actuacións, procedeuse á recuperación e limpeza de rutas que tiveron moita importancia na zona, como a do contrabando, para que formen parte agora do ocio do Concello. Ademais, acometeuse tamén a restauración de varios edificios municipais.

Actualmente, en Galicia estanse a desenvolver un total de 70 accións mixtas de formación e emprego. En total, estas iniciativas contan cun investimento, entre 2010 e 2011, de case 52 millóns de euros e benefician a preto de 2.000 alumnos, sinala a delegación Territorial da Xunta nesta provincia.