A Xunta adica 235.000 € ao programa “Reecontros na Terra” para casi 200 emigrantes con poucos recursos

Preto de 200 galegos da emigración con poucos recursos para costearse unha viaxe á península participarán no programa “Reencontros na Terra” organizado pola Secretaría Xeral de Emigración coa colaboración da Secretaría Xeral de Familia e Benestar, dependente da Consellería de Traballo e Benestar.
Con este programa, a Secretaría Xeral de Emigración pretende “achegar aos emigrados galegos con dificultades económicas a realidade sociocultural da súa terra de orixe mediante a realización de diversas actividades que lles permitan coñecer de primeira man a cultura galega e, ao mesmo tempo, reencontrarse cos familiares que permanecen na comunidade e cos que teñen dificultades para manter contacto”, sinala o departamento de Santiago Camba.

Os beneficiarios deste programa viaxarán a Galicia en dúas quendas. Un primeiro grupo de 131 emigrantes chegará a mediados do mes de outubro, e un segundo grupo de 59 persoas farao a mediados de novembro.
Emigración considera “fundamental” para a realización deste programa a participación da Secretaría Xeral de Familia e Benestar da Xunta de Galicia, departamento que correrá cos gastos derivados dos servizos de aloxamento e manutención dos seleccionados.
Estes, poderán facer uso das residencias de tempo libre da Comunidade durante un período máximo de 14 días, despois do cal poderán permanecer en Galicia xunto cos seus familiares ata un máximo de tres meses.