Un total de 7.208 emigrantes galegos en situación de precariedade veranse beneficiados polas axudas económicas que concede a Secretaría Xeral da Emigración. Os beneficiarios das axudas, destinadas a cubrir necesidades básicas de subsistencia e atención sociosanitaria, son tanto os emigrantes galegos residentes no exterior como os seus descendentes ata a segunda xeración que posúan a condición de galego segundo o establecido no Estatuto de Autonomía de Galicia.

A Secretaría Xeral da Emigración da Xunta de Galicia destina este ano 2.350.000 euros ao programa, cuxo prazo de presentación de solicitudes rematou o 31 de marzo. Á data de hoxe, a Secretaría sinala que tramitou 8022 peticións de axudas das cales foron admitidas 7208 solicitudes, denegadas 606 e 199 desestimadas por presentación da documentación fora de prazo.
Neste ano 2010 rexistrouse un aumento de 219 beneficiarios con respecto ao 2009, cando se concederon axudas a 6989 persoas. Concretamente Cuba foi o país onde se produciu un maior incremento de axudas concedidas que pasaron de 5.643 solicitudes admitidas no 2009 a 5.913 no 2010.

O programa ten como obxecto a concesión de prestacións de carácter social, dirixidas aos emigrantes de orixe galego que se atopen en situación de precariedade económica para cubrir así necesidades básicas de subsistencia e en materia de atención sociosanitaria tales como: situacións de dependencia ou enfermidade grave, invalidez ou enfermidade permanente, cobertura de medicamentos e tratamentos de enfermidades crónicas ou graves, violencia de xénero ou situación de paro prolongado.