O presidente do PP de Ourense, Manuel Baltar, garantiulles ás autoridades de Laza e aos 50 traballadores e técnicos da Brigada Rápida de Incendios Forestais (BRIF) de Laza, facer “todo o políticamente posible para evitar o desmantelamento que o PSOE quere facer desta base de elite que é un referente nacional estratéxico e técnico na loita contra lume”.
Manuel Baltar, acompañado pola deputada ourensá Ana Belén Vázquez, visitou este domingo a base de Laza, despois de estar presente tamén nunha reunión que fai poucos días mantivo o alcalde de Laza co conselleiro de Medio Rural, Samuel Juárez, que lle amosou o respaldo da Xunta a continuidade da BRIF de Laza.
Baltar Blanco anunciou que presentará no Parlamento de Galicia unha iniciativa para que a Cámara solicite ao Goberno do Estado o mantemento da base da BRIF en Laza, iniciativa que tamén levará Ana Vázquez ao Congreso dos Deputados, pedindo ademais a comparecencia da ministra de Medio Ambiente, Elena Espinosa, para que explique a postura do Goberno socialista ao respecto.
Asemade, pedirase á Deputación de Ourense que ratifique en acordo plenario o apoio ao mantemento da BRIF de Laza.

O desmantelamento da BRIF de Galicia e das restantes do Estado traería consigo, segundo explicaron as autoridades e os técnicos, a perda da coordinación que existe actualmente entre todas as demais BRIFs de España, co cal, ante un eventual incendio que requerise axuda doutros operativos, non existiría a necesaria e rápida coordinación que hai na actualidade.
Ademais de todo iso, a BRIF de Laza é a única de España que está tramitando os permisos para converterse en aeródromo.

Pola súa banda, o alcalde de Laza anunciou que levará a pleno a solicitude dunha reunión conxunta en Laza na que participen os 9 alcaldes das localidades españolas onde se sitúan as demais BRIFs que o goberno do PSOE quere desmantelar, e tamén propiciará o alcalde xuntanzas de ámbito autonómico cos deputados das comunidades autónomas afectadas.
A creación das BRIF remóntase a 18 anos atrás.
No caso da base de Laza conta con 45 especialistas, 6 capataces, 4 pilotos, 5 mecánicos aeronáuticos, 2 emisoristas, 5 enxeñeiros técnicos e un preparador físico. Para o transporte dispón de 2 helicópteros de transporte e bombardeiros de auga e máis de 7 vehículos todoterreo. Diariamente na base traballan 4 cuadrillas, sendo o seu ámbito de acción a zona noroeste.