Dende este pasado sábado, 2 de xaneiro, en que foi inaugurada polo conselleiro de Educación e Ordenación Universitaria, o Liceo de Ourense acolle a mostra “Gran Taller de Pintura”. A exposición conta con vinte obras ao óleo de dez alumnos do Taller de Arte e Decoración (TAD) da cidade de As Burgas.
Ata o 15 de xaneiro as pinturas están expostas no claustro do Liceo, sendo unha mostra máis do traballo levado a cabo no TAD, xa que moitas delas están firmadas polos primeiros estudantes do centro.
A través dos cadros móstrase o resultado da constancia e da paciencia dos autores, nos que se nota o progreso obtido na súa técnica día a día, grazas aos coñecementos adquiridos grazas á práctica diaria, ás indicacións dos profesores e, sobre todo, ao interese demostrado polos asistentes ao taller.
O TAD, que abriu as súas portas en 2006 nun local no centro de Ourense, ten como obxectivo ensinar a pintar e debuxar con todas as técnicas, sendo a máis empregada a do óleo. A través dos pinceis os alumnos poden expresar calquera idea cun material que lles permite facer correccións con facilidade. |
