A sede do Consello de O Ribeiro foi este martes escenario da precata para elixir os mellores viños da Denominación de Orixe Ribeiro da colleita 2008. Neste concurso participarán as marcas correspondentes á última anada das adegas inscritas nos rexistros da Denominación de Orixe Ribeiro, e presentes con stand, propio ou compartido, na Feira. Presentáronse un total de 60 viños, e as mostras presentadas foron recollidas por unha comisión do Consello Regulador na pasada semana. Fóronse recollendo en cada unha das adegas interesadas cuns volumes mínimos de 2.000 botellas de tres cuartos de litro no caso de brancos e de 1.000 nos viños tintos no apartado de adegas industriais, e da metade, 1.000 botellas de branco e 500 de tinto no caso das adegas de colleiteiro.
Da cata deste mércores sairán seleccionados 6 viños en cada unha das tres categorías existentes, viños brancos de colleiteiro, viños brancos de adegas e viños tintos. A cata será cega ao 100% é dicir, os catadores non coñecerán as marcas dos viños. Destas marcas seleccionaranse os gañadores (1º, 2º e 3º premios) mañá, na cata final que terá lugar na sé do Consello Regulador. |