Persoas que foron fusiladas, “claudiadas”, enterrados en fosas comúns, asasinadas polos nazis nos campos de concentración ou fusiladas por estes cando axudaban á liberar Francia. Son as "Vítimas silenciosas" ás que honran este ano os Amigos da República.
Dúas delas son o matrimonio formado por Manuel Suárez Castro e Celedonia Bretaña Montes. O “delito” de Manuel por ser socialista e alcalde de Ourense pagouno coa súa propia vida o 27 de xullo de 1937 no Campo de Aragón. Ademais da tristura por perder ao pai, a viúva e os 4 fillos coñeceron a partir daquel momento a penuria.
Similar situación foi a que viviu Serafina Fernández Fernández, dona de Víctor Pérez Bóveda, membro da UGT, mecánico en Malingre, quen tras a caída de Asturias entrégase en Vega de Viejos (León). Dende o 31 de outubro de 1937 este tenente do Exército do Goberno lexítimo está desaparecido. Viúva e 3 fillos tiveron que disgregarse para poder subsistir.
Como representantes de todas as familias que padeceron persecución, penurias e a inxustiza están Lolita Suárez Bretaña, filla de Manuel e Celedonia, e Manuel Pérez Fernández, fillo de Víctor e Serafina, quenes estarán presentes na conferencia no Paraninfo –lugar onde os golpistas condenaron a morte a cantidade de persoas, incluído Manuel Suárez-.
Así comeza este venres a xornada forte dos actos dos Amigos da República deste 14 de abril, que teñen neste venres o seu día central.
A continuación terá lugar a Cea-Festa da República, en Santa Cruz. Ao remate, a Big-Band da Deputación de Ourense porá a nota musical. |
|