O Concello de Ourense aprobou este xoves na Xunta de Goberno o protocolo de apertura do Telecentro de Novas Tecnoloxías e Formación que, ubicado na rúa Progreso, abrirá as súas portas en próximas datas, e que incluirá o primeiro punto de acceso inalámbrico a Internet da rede municipal "Ourense Wifi". O Ourense sen fíos era un dos contidos programáticos contemplados polo actual alcalde socialista, Francisco Rodríguez, na campaña das Municipais de 2007, que agora se bota a andar.

Concretamente, o Telecentro de de Novas Tecnoloxías é unha infraestructura municipal desenvolta en colaboración coa Secretaría Xeral de Comunicación da Xunta de Galicia, que conta con 20 terminais de ordenador, videoconferencia, sala de formación e o mencionado punto de acceso Wifi a Internet.
A súa actividade, que será dirixida pola Dirección Xeral de Promoción Económica do Concello de Ourense, estará centrada en cursos de teleformación, así como en proporcionar ós colectivos que o soliciten unha avanzada infraestructura informática para a celebración de cursos, congresos e actividades que requiran a videoconferencia.

O investimento realizado no Centro de Teleformación supera os 120.000 euros, e permiten ubicar nun local de case 200 metros cadrados en pleno centro de Ourense as máis avanzadas tecnoloxías de fibra óptica, videoconferencia e telefonía IP, wireless e teleformación.