"As máis de 1.500 mulleres, que anualmente acoden ao Complexo Hospitalario de Ourense para ter aos seus fillos e fillas, poderán desde agora optar por un parto máis natural e minimamente medicalizado, coa vixilancia materno-fetal precisa para evitar riscos, grazas a implantación desta modalidade asistencial que se enmarca nos obxectivos estratéxicos do Plan de Atención Integral á Saúde da Muller da Consellería de Sanidade". Así o sinala o Servicio Galego de Saúde trala visita da conselleira de Sanidade, María José Rubio Vidal, as novas instalacións.
O SERGAS sinala que para elo realizou un investimento de 110.291 euros, adicado fundamentalmente a remodelación e equipamento dun área específica para este servizo.
A nova unidade está situada na área de atención obstétrica, no primeiro andar do Hospital Materno Infantil, onde conta cunha superficie duns 40 metros cadrados, repartidos nunha ampla sala de dilatación e parto e un baño completo con cabina para uso da paciente. A principal novidade do equipamento, que ascende a 99.623 euros, reside en que todo el coincide no obxectivo de procurar unha maior comodidade e autonomía de movementos para afrontar o proceso do parto nas condicións mais axeitadas a cada muller.
Nesta liña, a sala conta cunha novidosa cama automatizada que permite tanto o reposo da muller durante o período de dilatación como a exploración xinecolóxica e o propio parto, grazas a súa convertibilidade e adaptación ergonómica. Xunto a ela, destaca a montaxe dunha bañeira de hidromasaxe, para facilitar a relaxación e a dilatación, e un completo equipo de monitorización materno-fetal, que inclúe doppler fetal e un cardiotocógrafo dotado cun sistema sen cables, para permitir a liberdade de movementos e autonomía da futura nai.
O equipamento complétase cunha cadeira de partos, para aquelas mulleres que opten por esta posición; un berce térmico para o recen nado e material de psicomotricidade para facilitar o posicionamento fetal.
|
|