A 600.000 euros alcanza a inversión da Consellería de Medio Ambiente para a renovación do colector xeral de saneamento con novos ramais á estación depuradora de augas residuais, e a mellora das redes de saneamento e abastecemento en varías rúas do núcleo urbano de A Rúa, que ven de aprobar este xoves o Consello da Xunta.
As obras, que aclara a Consellería que asume íntegramente, teñen un prazo de execución de oito meses.
Prevese que coestas obras se subsanen as deficiencias existentes, xa que na actualidade a rede de abastecemento é de fibrocemento de pequeno diámetro e ten máis de 30 anos de antigüidade, mentres que a de saneamento ten fugas e filtracións da rede de pluviais, polo que necesita ser substituída.
As actuacións previstas para renovar o colector xeral consistirán na colocación de máis de 2.000 metros de tubería de PVC así como o reforzo de varios treitos mediante formigón en masa. O proxecto inclúe ao mesmo tempo a renovación da rede de abastecemento na Avenida Quiroga, coa instalación de 280 metros de tubería, e a mellora do saneamento e abastecemento entre as rúas Progreso e Emilia Pardo Bazán, coa colocación de 220 metros de tubo para cada rede, máis outro treito de 220 metros para o subministro de auga ás vivendas.
As obras completaranse coa colocación de 70 metros de tubería de saneamento e 83 metros de abastecemento entre as rúas Fernández Lorenzo e Doutor Vila, máis outro treito de 73 metros de abastecemento para o subministro ás vivendas.
|