A iniciativa “Aprende a Coidarte” enmárcase nos programas de actividades que desenvolve a Concellería de Sanidade do Concello de Ourense para fomentar hábitos de vida saudables entre os ourensáns, segundo informa dita Concellería. "Neste senso, os estilos de vida da sociedade actual favorecen un aumento de certas enfermidades crónicas con consecuencias socio-sanitarias e económicas sobre a saúde e a calidade de vida das persoas", sinala este departamento do Concello de Ourense, que engade que a alimentación pouco saudable e non practicar actividade física con regularidade son os principais factores de risco para o desenvolvemento de enfermidades crónicas asociadas á obesidade (hipertensión, diabetes mellitus tipo II, dislipemia...). "Por iso, a loita contra a obseidade é un dos maiores retos da saúde pública no presente século", sinala Sanidade do Concello de Ourense.

Para dar resposta a esta problemática, o Concello, co apoio da Consellería de Sanidade da Xunta de Galicia, ten en marcha a Unidade Concello Saudable, destinada a intervir na poboación para promocionar estilos de vida saudables, con iniciativas como a que se desenvolverá esta semana nas Termas de Outariz.
Un equipo de profesionais realizará a valoración antropométrica dos visitantes da carpa e lles prestará asesortamento persoal sobre alimentación saudable e equilibrada e exercicio físico. A actividade desenvolverase nas Termas de Outariz, o xoves e o venres, de 11 a 13:30 horas e de 16 a 19 horas, e o sábado, pola mañá, de 11 a 14 horas.