Ante a detención dun traballador da empresa Seaga como causante de varios lumes forestais no concello ourensán da Veiga, dende a Asociación Profesional do Persoal Laboral do Servizo Público de Prevención e Extinción de Incendios Forestais da Xunta de Galicia (Apropiga) queremos mostrar o noso desacordo coa maneira de proceder da Consellería de Medio Rural nestes feitos.

Medio Rural, co seu Conselleiro á fronte, fai un claro deixamento das funcións que lle corresponden ó limitarse a anunciar que se vai presentar como acusación particular no xuízo do presunto incendiario, pero non asumindo á responsabilidade que lle corresponde polo fracaso que supón que sexa Seaga a empresa que contratou ó traballador detido.

Seaga foi creada pola Consellería de Medio Rural no ano 2007 e anunciada polos seus responsables como o comezo da profesionalización na loita contra os incendios forestais en Galicia, nun claro desprezo ós/ás traballadores/as do SPDCIF que durante máis dunha década levamos adiante estas labores, á vez que supuxo a externalización dunha parte do Servizo Público coas consecuencias que iso supón e que se están a ver no modelo de contratación do seu persoal.

A responsabilidade de Medio Rural é, polo tanto, non facer anuncios de cara á opinión pública cunha intención electoral, senón  a de esixir responsabilidades á empresa Seaga para previr que non volvan a acontecer casos coma este e que, individuos sen escrúpulos, usen os servizos de extinción para atentar contra a vida dos/as compañeiros/as e contra o patrimonio natural de Galicia.

Dende Apropiga, apelamos á sociedade  para que non se resigne a ver como o goberno da Xunta mira cara outro lado diante dun caso tan grave, limitándose a actuar como acusación particular contra o detido, namentres non move un dedo para cambiar o sistema que permite que individuos así campen ás súas anchas no actual modelo de extinción de incendios da Consellería.

O goberno está obrigado, polo seu compromiso con todos os galegos, a analizar e reformular o modelo organizativo que supón a creación da sociedade anónima Seaga, recuperando ás súas obrigas na labor de organización e mando do dispositivo, analizando as carencias e corrixindo os erros que permitiron que algo así sucedera.

Dende Apropiga levamos meses denunciando a creación da sociedade anónima Seaga, xa que introduce criterios mercantilistas na prevención e extinción de incendios forestais. Manifestamos os problemas de persoal que arrastra a sociedade anónima Seaga (cun preocupante déficit de contratación de 700 traballadores xa no seu primeiro ano de funcionamento) así como os complementos salariais que retribúen a labor desenvolvida polos seus traballadores e que son de difícil encaixe nun Servizo que debería ser público xa que, entre eles, atópanse un plus de produtividade na extinción ou o cobro de horas extras nos períodos de baixo risco, gratificacións introducidas coa creación de Seaga e que nunca existiron dende a creación do SPDCIF polo que, ó noso entender, introducen criterios de beneficio económico na prevención e extinción de incendios forestais, fomentando o binomio “a máis lume, máis traballo”; á vez que, co modelo de contratación dos traballadores de Seaga, precarízase o emprego e repítense os modelos que se pretendían erradicar coa eliminación das brigadas municipais.