Un home de 39 anos, natural do Concello de A Veiga, aínda que veciño do de Larouco, foi detido nas últimas horas pola Garda Civil como presunto autor de catro focos de lume que se produciron a partires das 12 da pasada noite en montes de A Veiga, concretamente montes dos veciños de Corzos, Prado, Espiño e Baños. O detido foi interrogado nas dependencias da Garda Civil de A Rúa, e logo pasou a disposición do Xulgado de O Barco de Valdeorras que pasa a levar o caso.

Segundo as primeiras investigacións que facilita Medio Rural da Xunta de Galicia, "o suposto incendiario contaba con experiencia na extinción de incendios xa que, durante varias campañas, formou parte da brigada do Concello de A Veiga", precisamente.
Medio Rural concreta, ademais, que o detido "traballa como persoal de reforzo de verán no dispositivo de prevención e extinción de incendios da Xuna de Galiza", no que ocuparía, sempre segundo Medio Rural, un posto de vixilante móbil na zona de O Barco de Valdeorras, "aínda que no momento da súa detención se atopaba de libranza".
A este respecto, fontes consultadas por OuD sinalan que o detido estaba contratado por SEAGA, S.A., empresa (pública, segundo Medio Rural) que asume nesta campaña o peso principal do persoal de reforzo da presente campaña de extinción de incendios forestais en Galiza.

Na información difundida pola Consellería de Medio Rural, o departamento de Suárez Canal incide especialmente na "eficacia no labor das forzas e corpos de seguridade, que permitiu deter a unha persoa que, presuntamente, pretendía facer dano ao País provocando incendios de forma intencionada en lugares de difícil acceso e durante a noite".

Anuncia Medio Rural que prevé persoarse no proceso xudicial que se abrirá, sempre e cando a autoridade xudicial decida imputar ao agora detido. Deste xeito, sinala a Consellería de Suárez Canal, búscase que "ademais das consecuencias penais que se deriven da súa actuación, teña que correr cos cuantiosos gastos que supoñen as tarefas de extinción".