A Consellería de Medio Ambiente e Desenvolvemento Sostible realizará obras de saneamento e de mellora de espazos naturais no concello ourensán de Vilariño de Conso. O conselleiro, Manuel Vázquez, reuniuse este mércores co alcalde, Arcadio González, para abordar o estado dalgúns dos proxectos que a consellería vai acometer neste municipio.
A Consellería comprometeu á próxima execución do proxecto de instalación da rede de sumidoiros nos núcleos de Pedralbar e Entrecinsa e no propio núcleo de Vilariño, ademais da dotación de servicios básicos na estrada de Trives.
Así mesmo, o concello de Vilariño de Conso beneficiarase das obras enmarcadas no programa “Parques para Vivir”, presentado a pasada semana polo conselleiro de Medio Ambiente, e que ten por obxectivo mellorar a calidade de vida dos habitantes de concellos integrados nos parques naturais. Mediante este programa, o concello de Vilariño de Conso poderá optar a axudas para obras de saneamento e abastecemento, para a recollida de lixo e instalación de contedores e para proxectos de educación ambiental. Entre as actuacións máis inmediatas atopase a recuperación e ampliación dunha ruta de sendeirismo. |