"Agora que os nosos viños son recoñecidos internacionalmente, somos capaces de atraer ó noso territorio a importadores que poderán coñecer ó mesmo tempo a nosa estrutura produtiva e a nosa cultura vitícola baseadas na calidade, na tradición e na conservación de castes vencelladas ó territorio". Con estas palabras clausuraba este martes o Conselleiro de Medio Rural, Alfredo Suárez Canal, a primeira edición de VINIS TERRAE, Salón profesional dos viños e licores de Galicia, un acto no que estivo acompañado polo delegado provincial de Medio Rural, Xosé Rodríguez Cid, e pola concelleira de Comercio de Ourense, Ana Garza, entre outros.
Suárez Canal destacou a evolución positiva das producións vitícolas galegas de calidade que acadou en 2007 un valor superior ós 142 millóns de euros. "Este incremento débese á aposta decidida e ó esforzo da Consellería de Medio Rural que puxo en marcha plans específicos de promoción e internacionalización das denominacións de orixe galegas para intentar que acaden cotas de mercado cada vez máis significativas. Uns plan de promoción para os que investirá 11 millóns de euros ó longo deste 2008", sinalou.
"As enquisas realizadas pola organización revelan o alto nivel de satisfacción acadado tanto polos importadores pola calidade do produto que se lles ofrecía, como polos adegueiros que destacaron a profesionalidade dos visitantes e a importancia e valor dos contactos realizados dos que agardan obter resultados a medio prazo", sinalan os propios organizadores, que engaden ao respecto que a satisfacción acadada polos participacentes e a implicación da Consellería de Medio Rural na promoción do viño e licores de calidade. "levan a pensar xa nunha segunda edición de VINIS TERRAE". |