Os concelleiros do PSOE no Concello de Beade veñen de presentar solicitude de celebración dun pleno extra do Concello, xa que o rexedor municipal, o popular Senén Pousa, sigue a non convocar coa periodicidade establecida por Lei os plenos ordinarios deste Concello. Nesa sesión plenaria, os dous concelleiros socialistas volverán a plantexar ao rexedor municipal que cumpra coa Lei da Memoria Histórica e retire os símbolos franquistas que aínda quedan en Beade.
Así, por exemplo, explica o concelleiro Miguel Ángel Carreiro que "no municipio temos varias rúas que levan nomes de personaxes da etapa franquista. A rúa principal leva por nome O Caudillo e hai outra outra, chamada Alferez Montero, en cuia placa se pode ler caído por Dios y por España".
Os socialistas tamén piden que se retiren os gravados da fonte de pedra sita no barrio da Presa na que se reflicten o xugo e as flechas.
Sinalan que, conforme á Lei da Memoria Histórica aprobada en decembro de 2007 polo Congreso dos Deputados, os símbolos franquistas deben ser retirados das zonas públicas en cumprimento da Lei.
O concelleiro socialista recorda ao alcalde, Senén Pousa, as palabras do seu presidente nacional, Mariano Rajoy, cando de visita a Ourense o pasado 29 de novembre sinalou ao respecto que "yo soy partidario, y hasta ahí podríamos llegar, de cumplir la ley siempre", e engadiu: "La ley está para cumplirla y todos debemos cumplirla, los ciudadanos y cualquier persona asuma las responsabilidades públicas que asuma".
Non é a primeira vez que os socialistas de Beade teñen que solicitar un pleno extraordinario para tratar os asuntos do Concello, e mesmo chegaron a recorrer ante o Valedor do Pobo para denuncialo. "A pesar de todo Senén Pousa segue a facer o que quere e segue sen convocar as sesións plenarias. A situación de tensión que se vive no Concello cada día vai a máis", sinala o concelleiro do PSdeG-PSOE, Miguel Ángel Carreiro.
|