O feito de que o alcalde de Verea non resida no municipio, leva a pensar aos socialistas deste Concello que o popular Juan Antonio Martínez González "non se da conta das importantes complicacións que está causando a supresión de varias liñas de transporte regular de viaxeiros". Segundo o portavoz do PSdeG-PSOE, Félix Parada, "as comunicacións de Verea con Ourense e con outros municipios da provincia é moi deficiente pero o Sr. alcalde non de decata da situación porque non vive en Verea".
Ao escaso transporte público, os socialistas engaden que só existe unha licenza de taxi en todo o concello, e que cada vez hai menos vehículos particulares debido a avanzada idade dos veciños.
Para solucionar este problema o Partido Socialista de Verea anuncia que pedirá ao grupo de Goberno que se poña en contacto coas Consellerías de Educación e de Política Territorial para solicitar o programa TES+BUS, e poder así aproveitar as liñas de transporte escolar que enlazan as diversas poboacións do concello.
Félix Parada explica que, nestes intres, o seu partido xa está a manter contactos coas administracións pertinentes para que veciños e veciñas de Verea poidan empregar as prazas de transporte escolar que, debido á baixa natalidade, van baleiras.
A isto, o Grupo do PSdeG-PSOE engade a acusación do seu portavoz de que os orzamentos de Verea "estanse investindo en chapuzas e favores electorais e non se empregan en actuacións importantes que solucionarían moitas das demandas diarias dos veciños e veciñas do municipio".
Para os socialistas de Verea, unha das prioridades do actual Goberno local tería que ser o remate das obras da estrada que comunica o Alto do Monte con Pitelos que, "se atopa nun estado penoso". Isto pese a que é, subliña Félix Parada, unha das estradas máis transitadas do municipio e non cumpre uns mínimos requirimentos de seguridade. "É moi estreita, tan só 3,5 metros de ancho fronte aos 5 metros que mide o treito xa arranxado cando gobernábamos os socialistas", sinala o portavoz do PSdeG-PSOE.
|
