Cunha dotación global de 55.000 euros, o Concello de Vilar de Santos está levando a cabo os proxectos dun Programa Ambiental con diversas actuacións a desenvolver no territorio municipal, englobado na Reserva da Biosfera Area de Allariz, declarada en 2005 póla UNESCO, e integrada polos concellos de Allariz, A Bola, Rairiz de Veiga e Vilar de Santos con vixencia ata o 31 de marzo de 2013.

O Concello que dirixe Xan Jardón ven de levar a cabo un programa específico para as diversas accións, que "deben alcanzar os obxectivos previstos para a consolidación do modelo de desenvolvemento municipal baseado no aproveitamento e posta en valor dos recursos propios, de base agraria e os relacionados coa industria e os servizos, pero apostando por novas áreas e outras alternativas que teñen que ver co aproveitamento dos valores culturais, etnográficos, paisaxísticos e naturais do noso territorio", sinala o Concello de Vilar de Santos.

As actuacións financiadas dentro deste Programa en Vilar de Santos son:

- A mellora e acondicionamento dos cauces de regatos e desaugadoiros coa súa limpeza, drenaxe e continuidade, para evitar o encharcamento dos terreos agrícolas e posibles inundacións e o deterioro dos cultivos e das infraestruturas. Actuación de suma importancia xa que actualmente está en cultivo o 60% do territorio municipal. Estanse acondicionando un total de 12 Km de cauces e desaugadoiros

- A eliminación e selado dun vertedoiro ilegal existente no concello coa recollida e separación dos residuos, o seu traslado a un  lugar autorizado xunto con outras labores de descontaminación e restauración e rexeneración da zona procedendo ao acondicionamento da zona, para lograr a súa integración paisaxística.

- O acondicionamento da rede de sendeiros e camiños para mellorar e diversificar a oferta de turismo e ocio do concello con novas posibilidades de disfrute da paisaxe e o medio natural e patrimonial acondicionando, limpando e desbrozando os sendeiros de Castelaus de 4,9 Km, o de Parada de 10,4 Km e o do Ruxidoiro de 3,6 Km na zona núcleo da Reserva.

Un Programa de Educación Ambiental levarase a cabo neste ultimo trimestre con cursos, conferencias e tamén incluíndo un proxecto piloto específico sobre residuos, a reciclaxe e o fomento da compostaxe, incidindo no consumo responsable e as boas prácticas ambientais.