O conselleiro de Cultura, Educación e Ordenación Universitaria da Xunta de Galicia, Xesús Vázquez Abad, asinou este martes un convenio co alcalde de Xinzo de Limia, Antonio Pérez Rodríguez, en virtude do cal se realizarán obras de mellora que suporán un investimento de 60.000 euros, nas instalacións da Casa de Cultura e Xuventude de Xinzo.
Tras asinar o acordo o conselleiro manifestou a disposición do departamento que dirixe de prestar o seu apoio á realización das melloras relativas á ampliación do salón de actos e do vestíbulo xeral, aso como da adaptación do edificio á normativa de accesibilidade e seguridade.
Do mesmo xeito tamén se adaptaran novos locais destinados ao departamento administrativo.

Xesús Vázquez destacou a importancia de que as Administracións públicas colaboren, tanto na posta en valor das nosas tradicións ancestrais, como na posta a disposición de espazos e infraestruturas onde poidan ser compartidas polas cidadás e cidadáns.
Deste xeito, o conselleiro felicitou ao alcalde, o popular Antonio Pérez, polo traballo desenvolvido polo concello para conservar o simbolismo que rodea ao Entroido de Xinzo de Limia, neste caso a través do Museo do mesmo nome.

Neste punto destacou Vázquez Abad que o Entroido de Xinzo de Limia "é unha festa recoñecida como de Interese Turístico Nacional, tanto pola figura da pantalla, personaxe destacado do Entroido polas súas vestimentas e movementos, como pola participación de toda a comunidade nos cinco fins de semana que dura o ciclo festivo", sinalou o conselleiro na súa visita a mañá deste martes a Xinzo de Limia.